睇動漫學日文(由0開始懶人包)

學日文?梗係睇住動漫學啦,就算完全唔識,聽得多都講到兩句。有人會學完日本初級,背左好多野先,但係,睇住動漫字幕,見到有乜唔識,揾Google神幫手,先背相關既野,可能更加事半功倍。

不過,一開始始終都要知少少,以下提供日語入門”超級懶人包”,睇完之後,我地一齊睇"進擊的巨人"第一集字幕。


五十音

學英文要先學ABC,學日文就先學"あいうえお",讀做"a i u e o", 用廣東話你可以當佢讀”丫依烏EH痾,(EH同爹同韻)。"あいうえお”之後係"かきくけこ”,即係"ka ki ku ke ko",如此一行行咁學,一行有五個段(五個音),一共有十行,所以就叫做五十音。

平假名清音一覽

不過日文對一個音,有兩種寫法,對於外來語(英文呀,法文呀)會用另一套ABC黎寫,之前學既"あいうえお"叫平假名、相對既"アイウエオ"叫片假名。(吓?說好的五十音呢?咁咪變左要學一百音囉!)未背到?,唔緊要, 以下我會加埋羅馬字(即係用英文aiueo)黎講。其實知道正確既羅馬字已經可以係電腦輸入日文。

講多少少,有時你地會見到有啲細隻啲既日文字如”きゃ”裏面既"ゃ"我地叫拗音,兩個音[き/ki]同[や/ya]會讀埋一齊, 羅馬字用"kya"黎表達, 另外,"かった"裏面既"っ"係唔讀,叫做促音,"かった"羅馬字會寫成"katta",將後面果聲母t寫兩次,代表"か/ka]"同"[た/ta]"中間會停一停,因為有個促音。

五十音講住咁多(清音,濁音,長音唔講住)


 漢字

我地睇日文,最鍾意就梗係睇到漢字喇,唔識讀到估到係啲乜。每個漢字都可以用平假名寫,如”漢字”的平假名是”[(平假名)かんじ/(羅馬字)kanji]”,”無料”的平假名是”[むりょう/muryou]”,(係呀,”りょ”係上文提到既拗音, [り/ri]+[よ/yo] = ryo )。咦?咁似中文讀音既,係呀,中國傳入去架嘛,依啲叫"音讀"。一個漢字o係唔同既用法,可能有唔同讀音。”目”,日文解作眼,讀"[め/me]” (* <- 羅馬字讀音,讀咩,唔係讀咪架) ,係日本本土既音,叫"訓讀",”目標[もくひょう/mokuhyou]”裏面既"目[もく/moku]",係音讀。


句型

好啦,學句子喇。學兩句用住先。

1."私は木村です"- 成句解作:我係木村。

私 – 解:我,讀[わたし/watashi]
は – 助詞,讀[は/ha] 依度有啲特別,要讀wa,代表前面既係主語,句子的主題。
木村 – 解:木村,讀[きむら/kimura]
です – 解係/是,讀[です/desu]

成句讀做watashi wa(ha) kimura desu

2. 私は食べ物を買います

私 – 解:我,讀[わたし/watashi]
は – 助詞,讀[は/wa(ha)],代表前面既係主語
食べ物 – 解食物,讀[たべもの/tabemono]
を – 助詞,讀[を/wo],代表前面既係賓語。
買い – 動詞,解買,讀[かい/kai],字典原形係”買う”,我地叫辭書形,後面接住”ます”,所以依度轉左做連用形。下一段會講動詞活用。
ます – 讀[ます/masu],敬體助動詞,放係動詞之後,句子既結尾。敬體,即係比較禮貎既講法。

成句讀做:watashi wa(ha) tabemono wo kai masu

可以見到日文裏,動詞係擺係最後。主語同賓語放係前面。

所以中文
– 我食飯
日文會變成
– 我飯食


形容詞

形容詞,我唔講太多喇,只要記住有啲形容詞係[い/i]尾,好似想講好味,日文係:美味しい[おいしい/oishi]。有啲形容詞係接[な/na], 好似話人好精神,元気[げんき/genki],就會用”元気な人”、依類我地叫做形容動詞。(吓?形容動詞?同動詞有乜關係?)


動詞

終於黎到最後,亦係我最想講既部份。學英文,我地會學tenses,學日文,我地叫動詞活用,係咪好型?動詞主要分兩類,一段動詞同五段動詞。我先講五段動詞。

五段動詞最後一個音變化後,可以表達唔同既tenses。譬如,”聞く[きく/kiku]”係一個五段動詞,解作:聽。聞く的[く/ku]可以變化。記唔記得五十音有講過一行有五個段,[く/ku]是[か/ka き/ki く/ku け/ke こ/ko]的其中一個段。下面我地睇吓點變。

聞かない [きかない/kikanai] – 否定句(negative)唔做某啲野:唔聽。
聞きます [ききます/kikimasu] – 敬體(masu-form):聽。
聞く [きく/kiku] – 辭書形(dictionary form):聽。
聞ける [きける/kikeru] – 可能(potential)有能力做某啲野:聽得到。
聞こう [きこう/kikou] – 意志(volitional)想去做某啲野:去聽囉

日文都有過去式,進行式,被動式,使役形,可能形,命令形,重有一段動詞,する/くる等特殊動詞,唔使急,之後你可以慢慢背,都係有pattern既。

好喇,依家就開始睇片(字幕)。

by ZERO